【職場危機】老細安排新同事向自己「學嘢」係被炒先兆？

職場上充滿競爭，本來就係常態，加上而家經濟環境唔穩定，中美貿易戰等外圍因素波動，打工仔想保住自己份工都好合理，畢竟手停就口停。有巴打響討論區開post，話自己好不安，直言有危機感，覺得自己將被老細「踢出局」，請求網友教佢點樣自保。究竟係乜原因令佢咁諗呢？

巴打解釋，近日公司上司「突然」安排左一個新同事，同自己學嘢，所以感到不安。佢本身係做行政工作，部門所有文書都關佢事，主要係負責編更、記錄，並整理部門工作唔同狀況。呢個部門本來人手就唔多，所以就由佢一個做晒所有嘢。

教新人＝踢自己出局？

佢話工作上嘅嘢，部門入面暫時得自己一個識做，所以心大心細究竟應唔應該教新人全部工作流程。有人叫巴打不如辭職並搵第二份工，好似有位仁兄就咁講：「如果要踢你出局，佢人都請左，你教唔教晒，你都係會被炒。(與其)晒時間同佢磨，不如搵定後路。」不過佢坦言因為屋企問題，暫時唔可以辭職，而且話辭職後會搵唔番一樣待遇嘅工。

老細有求於你「教人嘢有乜好怕？」

雖然不少網民都叫佢搵工好過，但都有人教佢點樣「應對」。有人話巴打對新人「教方向」就足夠：有人引伸講，若果新人再細問情況，佢可以答「無得解，上手係咁講」，跟住就比份文件新人研究，甚至要「扮忙教唔到」，叫新人睇佢點樣做；有人更講出「心法」，話巴打可同新人保持友好先，順便攞料收風，工作上就慢慢教同拖，要拉長個學習時間，要令人感覺佢有教嘢，只係新人「學得慢」；亦有人覺得巴打不用悲觀，因為覺得新人一日未識，老細都有求於佢。甚至有人好直咁講：「教人嘢有乜好怕？」

巴打回憶返自己剛做呢份工時，上手對自己其實都只係「教咗少少」，跟住對方就轉咗第二份工，往後好多時候都係靠自己睇番以往文件，慢慢摸索點樣做。所以都有人話，其實佢只要跟番上手個做法，淨係教新人少少已經可以。其實喺呢個情況，有時真係唔駛諗太多，巴打本來都只係一人做晒所有嘢，而家有人幫輕下係咪真係壞事呢？做嘢太緊張有時可能諗埋一邊，既來之則安之，東家唔打打西家，筆者相信天無絕人之路，都希望巴打工作順利。

來源：連登討論區

相關字：

職場 打工仔 新同事 教新人 辭職 搵工 中美貿易戰 自保