【劇透慎入】《大帥哥》四個重要人物會死「馬炭」洪永城真奸定假奸？

張衞健主演嘅《大帥哥》去到尾聲，講「馬炭」洪永城同「狄大帥」兄弟變仇人，尤其係洪永城殺死天嬌同兄弟羅義嗰幕，睇到網民相當肉緊，大罵「馬炭」反骨，有網民覺得編劇識玩，將馬炭寫到成魔，但又唔係壞到盡，咁個角色就多啲變化，搞到網民囉囉攣，估洪永城係真奸定假奸，而佢會唔會係忍辱負重呢？而羅義又係咪假死，究竟洪永城係咪衰到尾？大家嘅下場係點？最尾又會唔會「公式化」嘅大團圓結局？

前晚嗰集講「羅義」徐榮劫獄救走「大帥哥」張衞健，為咗掩護大帥哥，特登畀「李細龜」張達倫發現，起初講馬炭扮晒冇心殺羅義，之後仲抱住羅義流下男兒淚，呢場喊戲，網民覺得洪永城做得幾自然，佢亦唔再幫革命黨，而天嬌嘅日本黨羽又睇中馬炭，搵「根本英俊」趙永洪說服馬炭與日本人結盟，加上之前劇情亦講到馬炭係佐藤家族嘅人，即係馬炭好大機會倒戈幫助日本人噃。

據知結局有四個「重要人物」會死，當中必死就係奸角「李細龜」張達倫、「根本英俊」趙永洪、「蒙大同」蔡國慶，咁仲有邊個會死?

而「馬炭」洪永城係一心想做統領軍閥嘅大帥，有人阻擋佢完成目標，先鏟除嗰啲人，即係佢係有心殺羅義，後嚟畀大帥哥打動，同大帥哥一齊協力，鏟除蒙大同，而馬炭亦冇幫日本人。

洪永城呢次演奸角，唔少網民睇到咬牙切齒，演技確係有進步，o依家佢就拍緊新劇《黃金有罪》，講股票市場同商業騙案嘅劇情，唔知佢係咪又做啲亦正亦邪嘅角色呢？