雅虎香港新聞 
【跳躍生命線】向觀眾派彩蛋 何廣沛穿越兩劇 仲有兩個身份？
台慶劇《跳躍生命線》聽晚就大結局，「雄姐」張彥博提早「落更」令人耿耿於懷，幸眾角色暫時放下傷痛，早前一集更為大家帶來一個小小彩蛋，發現何廣沛竟穿越兩套劇集，仲有兩個不同身份！大家有冇留意到呢？
撰文：東方新地｜圖片：劇集截圖
延伸閱讀：
《跳躍生命線》雄姐殉職
《跳躍生命線》收視屢創高峰，為近年少有的高質本土作品，劇中各人物鮮明突出，其中張彥博飾演的雄姐係全劇最受歡迎人物之一，與何廣沛、郭子豪經常以三兄弟姿態示人，雄姐性格溫柔體貼、單純天真，令觀眾留下深刻印象！
雄姐墮樓身亡
可惜雄姐呢個角色喺早前一集，因接報到唐樓單位出勤時，房間地板突然坍塌，雄姐最後墮樓受重傷，並送上救護車趕往醫院搶救。何廣沛一邊用盡全力為好友兼同袍雄姐做心肺復甦，一邊大叫：「雄姐醒啊！」，可惜雄姐最後宣告死亡。
3雄姐因救人殉職，令觀眾心傷。
一幕幕回憶重現觀眾眼前
與此同時，劇集更安排雄姐的暗戀對象River(李靖筠飾) 含淚彈結他，一幕幕回憶重現觀眾眼前，讓觀眾從入學堂開始到出班一同回顧雄姐點滴，賺人熱淚！
劇名及片尾曲轉成黑白
最後連劇名及片尾曲都由平時的彩色轉成黑白，再配合雄姐講出：「咁多位兄弟，我落更先啦，Good Day！」，成個效果極為煽情，同時亦為雄姐呢個角色的一生畫上句號。
雄姐，落更啦！
陳瀅陪羅蘭完成臨終願望
劇中陳瀅與羅蘭姐的嫲孫情真摯動人，可惜羅蘭飾演的愛姐患上重病，命不久矣，於是佢訂出一個臨終前的願望清單，希望孫女陪佢完成！ 於是陳瀅陪住羅蘭姐食甜品、夾公仔、最後再去造壽衣…… 雖然傷感，但亦溫馨。
《跳躍生命線》向觀眾派彩蛋
近日有人指《跳躍生命線》感情戲太多，應該改名叫《跳躍感情線》，臨近結局當然要交代多位角色的感情發展啦！其中愈走愈近的何廣沛及劉佩玥一齊去果欄買生果，何廣沛就表示自己曾在果欄打工，熟晒架步，實買到好嘢！
何廣沛曾在果欄搬貨？
去「和豐欄」搵「大巴姐」？
Crossover《果欄中的江湖大嫂》
其實心水清的觀眾應該都知啦，何廣沛同劉佩玥去的檔口正正係今年3月《果欄中的江湖大嫂》中，女主角陳煒經營的「和豐欄」，而陳煒喺《果欄大嫂》中外號就係叫大巴姐。
何廣沛穿越兩劇 仲有兩個身份？
其實點解會有呢個彩蛋出現呢？因為何廣沛原來有份客串《果欄中的江湖大嫂》，喺大結局一集以果欄新人的身份現身，表示自己剛剛頂下一個果欄做店主。
《果欄中的江湖大嫂》係新手檔主，但何廣沛去到《跳躍生命線》就自稱搬過貨，唔通佢真係做唔掂生意，索性搬貨就算？
延伸閱讀：
