《大帥哥》開播好評如潮 舊金句勾起童年回憶

張衛健事隔多年再次回歸港劇懷抱，佢嘅回巢之作《大帥哥》喺未出街之前唔少觀眾已經話好期待。等咗年幾兩年都未播，唔少人都擔心劇集會淪為倉底貨，好彩劇集喺星期一終於開播。張衞健果然冇令大家失望，網民嘅評價大多數都係正面，而家就同大家睇下網民對劇集有咩回應啦！

講舊金句勾起童年回憶

劇集播出3集，張衛健已經講咗唔少佢過往嘅經典對白，好似一開場，佢以大帥造型霸氣出場，佢問手下自己有幾型，之後徐榮就答佢「型到跌渣」，佢就話自己唔係型到跌渣，係型到噴汁呀！之後喺劇中佢仲有講「涼風有信，秋月無邊，虧我思嬌嘅愁緒好比度日如年。雖則我唔係玉樹臨風瀟灑倜儻，但我有廣闊嘅胸襟加強勁嘅臂彎。」、「如來佛祖玉皇大帝觀音菩薩指定取西經特派使者花果山水簾洞美猴王齊天大聖孫悟空」及「Yo! 打妖精咋嘛，使乜驚啊！」唔少網民都話呢啲金句好正、真係好經典同埋勾起童年回憶。不過亦有網民話講舊金句係欠新意同睇到好尷尬。

除咗翻炒舊金句之外，張衛健喺短短幾集已經有新嘅金句，例如係「型到噴汁」同埋「誰大誰惡誰正確」，有網民已經話好期待劇集會有幾多金句成為經典。

張衛健擔起成套劇

張衛健今次喺劇中飾演人稱「大帥哥」嘅狄奇，開頭時狄奇只係一個小小伍長，之後因為拯救咗蒙大帥（蔡國慶飾），所以獲升級成為旅長兼管理昇威鎮。睇咗幾集，唔少人都繼續俾佢嘅「張衛健式」演技吸引，認為佢演得生鬼搞笑之外，同時亦有嚴肅無奈嘅一面，同時會機關槍式講對白亦都恰到好處。唔少人都大讚佢有壓場感，全靠佢擔起成套劇，紛紛留言讚佢「相信全世界睇呢套劇都係睇張衛健」、「佢真係幾好戲」、「呢個角色真係張衛健做最正」、「證明一個重量級嘅演員壓陣幾咁緊要，一個由頭帶到尾」、「基本上張偉健帶住成班人做戲」及「張衛健救成套劇」等等。

劇情輕鬆有趣

劇情除咗講述狄奇升級成為旅長兼管理昇威鎮之外，仲有講到鄰近三個地方大帥將自己嘅老婆艾妞（楊秀惠飾）及葉天嬌（譚凱琪飾）送俾佢做姨太太、章沅婉（蔡思貝飾）係革命黨成員不過刺殺蒙大帥失敗，仲成為狄奇嘅姨太太、兄弟馬炭（洪永城飾）、羅義（徐榮飾）、冬來（李嘉飾）同狄奇齊齊喺地雷陣救沅婉、艾妞及天嬌喺大帥府爭寵及佢哋揀店舖收取進貢等等。劇情輕鬆、搞笑又有趣，唔少網民都話「套野輕輕鬆鬆幾過癮丫」、「呢套先有資格做台慶劇」及「幾搞笑」等等，真係啱晒返工壓力大嘅打工仔，返完真係可以減壓輕鬆一下。

蔡思貝好索及演技有進步

蔡思貝喺劇中飾演革命黨成員及狄奇嘅姨太太，一出場唔少網民已經讚佢靚咗同演技進步咗唔少。佢一出道就成為無綫力捧花旦之一，當時演技幼嫩兼聲線高音，不過就經常做女一，令網民反感。不過近年演技開始有進步兼唔再用高音嘅聲線講對白，慢慢令大家對佢改觀。今套劇網民都讚佢「型又得 靚又得」、「蔡思貝好正」、「佢越來越正，演技又越來越好」及「眼前一亮」等等。