【張馨月「峯宅」晒命】未獲富三代男友認愛 傳吳千語想翻撻林峯被拒

林峯同「七愛」吳千語，五年情玩完，今年3月分咗手，轉頭千語被爆與全國政協施子青長孫施伯雄Brian拍拖，而林峯亦好快戀上大陸o靚模張馨月，各自搵到另一伴。今日有周刊指千語不獲Brian認愛，又想翻撻林峯，但已經有新歡嘅林峯，堅拒翻撻。

報導指上月尾25歲生日嘅千語，富三代嘅男友Brian卻冇影，雖然二人曾蜜遊歐洲，但一直未被男方承認女友身份，故此一直唔敢高調晒愛，還要慳家坐經濟客位。更有指千語喺微博不時轉帖有關愛情嘅文章，其中一篇文章講一對戀人分手後，其中一人想重新開始，可惜一切已成定局。尤其文中其中一句，「我錯過你了，你也錯過最好的我了。」有指千語明示與暗示想翻撻林峯。

報導指千語當年同林峯拍拖時，性格自我只想獨霸男友，唔理其他人。相反張韾月順得人又好識氹人，又對林峯千依百順，甚得林峯寵愛。而且張韾月跟林峯堂妹林夏薇、契姐周勵淇好合得來，令二人感情一日千里，林峯早已帶女友返廈門見家人，到今年9月林峯更出席張馨月胞弟嘅婚禮，雙方早已經一家親。

至於想翻撻嘅千語，以前同林峯拍拖時就唔使憂，但近月佢要靠自己，出入坐的士，而一直瘦到似火柴人嘅千語，要增肥兼放風想接多啲工作。相反林峯寵愛嘅新歡張馨月，不時晒闊太生活。