中環期間限定抹茶店 創意特飲 西瓜熱情果抹茶最啱夏天！

中環最近有間格局精緻，以粉紅色為主調嘅靚靚pop up店，原來係香港首個本地抹茶品牌開設嘅期間限定茶飲店嚟。有多款抹茶特飲，配搭創新之餘，仲夠晒健康，牛奶可以轉做燕麥奶、杏仁奶等，仲有得加骨膠原，而且絕對唔加精糖。

品牌選用京都宇治嘅抹茶粉，製作出一杯杯打卡一流嘅健康抹茶特飲。例如今次限定嘅西瓜熱情果抹茶就最啱夏天飲喇，每朝早新鮮榨西瓜汁，飲落酸酸甜甜fresh到爆，仲食到粒粒果肉，同埋熱情果核添。

至於另一杯打卡特飲漸層雜果抹茶 (Starburst matcha)有漸層效果，一層黃一層紅嘅係新鮮自家製嘅芒果醬同紅莓醬，淺藍色嘅則係以蝶豆花打成嘅奶。呢杯嘅抹茶味會濃少少，有啲甘澀。

芝麻抹茶拿鐵則加入食用碳粉製作，首先會飲到微甘嘅抹茶，再慢慢滲出芝麻香，兩者味道平衡。

粉藍色嘅Blue latte，最容易打動每個少女心，呢杯混合咗蝶豆花、薰衣草同牛奶，店員即場沖製同拉花，最尾再放多幾朵食用花喺面，點可能唔心動？

另外仲有幾款本地品牌嘅純素糕餅，包括純素曲奇、海鹽柚子純素貝殼蛋糕等，港島OL朋友又多個健康早餐選擇啦~

期間限定：即日至10月31日