《全民造星2》下週一首播 邊位仔仔最有星味？

上年ViuTV嘅選秀真人騷《Good Night Show 全民造星》非常成功，打造咗組合MIRROR和ERROR，當中MIRROR成員人氣王「姜B」姜濤最受注目，去到邊都有大量支持者。嚟緊下星期一播出嘅《全民造星2》大家又睇吓邊位最有機會彈出？

14號吳啟洋（Phoebus）有「翻版金秀賢」嘅稱號，而且幕前經驗豐富，除咗參加過Ustar大專校草選舉之外，亦都係唔少商品嘅代言人，就連上屆冠軍姜濤都視佢為熱門人選。

18號黃浚銘（Boris）就帶點韓風味道，20歲唔夠嘅佢已經係知名嘅YouTuber，擁有二十萬fans！就算IG亦有13萬個followers！論人氣已經行先一步。

62號姜卓文（細John）嘅父親就係姜大衛，唔知會唔會又畀返幾分薄面呢？細John就係上年先畢業於薩凡納藝術設計大學，身形高挑青靚白淨，家族遺傳不可少！喺社交平台經常自彈自唱嘅細John上到台又得唔得呢？

41號胡學軒（Alfred）嘅文弱書生feel，反而係眾多猛男當中容易成為焦點！唱歌技巧亦相當唔錯，標籤佢為實力派歌手不足為過！

29號梁德忠（Tank）原先就係上年《全民造星》嘅熱門，但就因為工作關係而退選。今年再接再厲參加《全民造星2》至少贏咗經驗先啦！

64號㓋助昇（Aiden）擁有高大嘅身形，又略帶一點壞孩子個性！而且佢已經係太陽娛樂旗下嘅演員，後勤支援充足得多。

陳卓文一見到佢個造型係咪好熟面口呢？本身係一位自由身演員嘅陳卓文同姜濤一樣都係99號，加上佢仲同上年嘅姜濤服裝一模一樣！不過點都好，原先冇乜話題嘅佢至少都有一個talking point啊！

82號邱凱雄（Hugo）外型就輸蝕咗少少，尤其是現今瘦就是美嘅標準！不過《全民造星》上一次得第四名嘅梁業都係肥仔一名，而家仲做埋Error嘅隊長，成功出道。Hugo唱功不俗，絕對有做黑馬嘅本錢。