Amazing Summer又到啦！暑假有咩劇集好睇？

就嚟到暑假，即係話又到無綫Amazing Summer嘅時候啦！早前無綫就派出逾60名藝員，出席「TVB Amazing Summer記者會」為夏日新節目宣傳造勢。咁今年又會有啲咩劇集喺暑假期間播放呢？而家就即刻同大家介紹一下啦！

喺8點半檔期，除咗有由陳煒、黃智賢及張達倫主演，以圍村作為劇集背景嘅《好日子》之外，無綫亦安排咗又鄭則士、苑瓊丹、黎諾懿及黃智雯等人主演嘅小品劇集《街坊財爺》緊接播出。劇情主要講述戴金仔（鄭則仕）由一個不擇手段放數追數嘅貴利王，變返做一個回饋社會嘅愛心財爺。

至於9點半檔期方面，喺播完醫療重頭劇《白色強人》之後，無綫就安排咗3套劇集喺呢個時段播出，分別係7月15日首播嘅《十二傳說》、8月19日首播嘅《她她她的少女時代》及9月16日首播嘅《十八年後的終極告白》。

由蕭正楠、林夏薇、劉佩玥及張穎康主演嘅靈異劇《十二傳說》，劇集原本喺上年8月播出，不過因為要讓路俾《延禧攻略》而被抽起。劇集以香港都市傳說為主題，由記者蕭正楠、民俗學教授林夏薇及警察張頴康，一齊調查香港發生嘅奇案奇事，例如有狐仙、西貢結界及新娘潭等等。

由田蕊妮、曹永廉及李思捷等人主演嘅《她她她的少女時代》，以中年危機做主題，講述一班中年人喺人生旅程面對啲咩危機，同埋佢哋點樣克服危機，然後繼續追夢。。

而心理懸疑劇《十八年後的終極告白》就搵嚟譚俊彥、陳山聰、黃智雯及楊秀惠等人主演，以一宗18年前命案作為背景，7個喺屋邨長大嘅少年，與混混起爭執，導致呢個混混身亡，佢哋決定屍葬。18年後條屍俾人發現，重案組接手呢單案，抽絲剝繭慢慢將真相揭開。

除咗以上劇集之外，呢個暑假仲會播出唔少綜藝節目，例如有《識玩旅行團》、《懿想得到》、《我的寵物》﹑《荷蘭好玩》﹑《打工捱世界III》、《Ben Sir睇樓團》和《12個夏天》等等。