雅虎香港新聞 
《 有樓萬事足 》「高潮女」Seasun VS 「105%姐」Macy
無綫編導岑應製作的真人騷如《沒女大作戰》、《盛女愛作戰》及《沒有起跑線？》等，往往能成功掀起全城話題，昨晚首播的《 有樓萬事足 》，邀得一班不同背景、不同心態的港男港女如何在樓價高企的年代，用盡方法置業。其中最令人關注的莫過於拜金港女Seasun，露骨金句「有樓有高潮」令人嘩然；而另一個惡啃港女Macy亦引起公憤，佢食同住全部靠屋企，在外就靠男朋友俾錢，最後成功上樓… 唔怪得香港咁多男士都寧願單身啦！
港女Seasun：「我好貼地」
現年22歲的Seasun對於樓係相當執着，佢指出要有愛巢先會有高潮，有高潮受孕率先會高。（小編真係聽到反白眼…）
1. 有樓有高潮
Seasun所講的「有樓有高潮」惹人非議，佢就解釋高潮係建基於安全感，女性要喺一個安穩環境先會容易有高潮，以致關係會和諧。
現職公關的Seasun更指有男性送樓俾自己一定會接受，因為係對方的心意。當然，佢哋之間有冇結果又係另一回事，因為很多事都講唔定。咁又係呀，最好個個男朋友都送層樓俾你，然後俾你飛就最好啦！
2. 無樓唔好白撞
除了「高潮論」，Seasun又講過:「無樓唔好白撞」，言下之意是有樓有錢的男人，先有資格親近自己。
3. 我好貼地
財經雜誌《港股策略王》2月15日搵來Seasun直播，以為佢會為自己平反，點知佢話：「其實我好貼地㗎喎⋯⋯」
相信每個人聽到Seasun的語錄後都不禁打了個頓，節目就搵來了一個男生向Seasun提出問題：「如果你老公好有錢，但一夫多妻制，你又接受到嗎？」Seasun竟然用猴子做例子回應…
至於2000呎的樓可能要數千萬，首期已經要一千萬，問到Seasun打算如何入手，佢就理所當然話係男方負責俾錢… 到底有邊個會甘願拜倒佢石榴裙下呢？
Seasun喺節目中博到盡上陣，不斷搔首弄姿，之後連整蛋糕都要瘋狂倒奶！Seasun又話如果將來同另一半住埋一齊，佢就會問整完蛋糕之後問對方：「Dessert你要佢定要我？」 小編無言了。
極品Macy只顧上樓
香港樓價高企、消費又高，普通人儲錢已經辛苦，想上樓簡直難過登天！但23歲港女Macy竟然可以每個月儲蓄105%，年紀輕輕成功上樓，到底佢如何做到？
1. 食、住在家
所謂「人無恥便無敵」，喺屋企食同住，所有洗費都唔會出。就連平日外出食飯，Macy都會選擇可以用八達通消費的地方，咁樣佢就可以叫家人再幫佢增值，好讓佢繼續月儲105%。
2.一毫子家用都冇
雖然Macy能成功上樓，但佢媽媽就直指Macy的行為相當自私，令佢好唔開心。
但Macy反指佢已經如此辛苦地節儉儲錢，家人應該給予佢鼓勵，而非指責。（小編：唔通你家人養活你又唔辛苦？）
3. 外出靠男友全數負責
相信就算冇第1、2點，Macy一樣會被千夫所指。因為佢出街理所當然咁用男朋友錢，自己一毫子都唔出，簡直係當今世上最罪大惡極的事！現時大家每日最關心就係鬧爆港女靠男人，男女不平等等等。「105％姐」，最好有心理準備節目播出後被圍攻！
全文完
原文-新假期 text-專題組 photo-圖片為TVB官方宣傳片段截圖 經授權取用、myTV截圖
延伸閱讀：
