【有個穩定男朋友】「細龍太」陳偉琪性感裝束約會髮型師

現年28歲嘅陳偉琪（Vicky），除咗擁有34E魔鬼身材之外，佢仲熱愛運動，仲係八級豎琴鋼琴高手。佢憑無綫處境劇《愛·回家之開心速遞》中飾演惡毒、巴辣又鍾意亂搞男女關係嘅「細龍太」雷珍妮Jenny。雖然角色性格唔討好，不過網民就好鍾意，Vicky更人氣急升及成功入屋。外國長大嘅Vicky比較「鬼妹仔」性格，平時亦鍾意以性感打扮示人。喺今日就有傳媒報道指已經有個拍拖3年健身教練男朋友嘅Vicky，就被影到佢同髮型師Ryan約會。

報道指身穿性感衣服嘅Vicky原本同兩位男性朋友外出，不過其中一位逗留一陣就走咗，淨返佢同髮型師朋友。之後佢哋就叫咗支香檳，飲咗兩杯之後，佢哋就越坐越埋。電力十足嘅Vicky仲好主動咁投懷送抱。Vicky成個人想瞓落去Ryan度，不過Ryan就有啲避忌，同手擋住令佢坐返好。你知啦！話晒都係公眾地方呀嘛～埋單之後，Vicky仲公然翹住Ryan，行返去髮型屋。

其後，正印男友Billy就嚟車返屋企。有幾分醉意嘅Vicky行唔到去停車場，Billy就去攞車，而Vicky就有髮型屋職員照顧住先。上車後，男友就好細心咁送佢返屋企。