《幕後玩家》宣傳片誇張離地惹公關業界人士不滿

無綫新劇《幕後玩家》喺下星期一接捧《巨輪II》由黃宗澤、蕭正楠、張繼聰及黃翠如等主演，故事以公關行業為背景，唔知大家有冇留意播出嘅宣傳片呢？只係出咗幾條宣傳片，劇集都未出街就已經惹嚟網民同公關業界人士不滿及迴響，當中Facebook專頁「廣告狂人」更撰文指劇集塑造嘅PR形象不實。

只係幾條宣傳片已經可以睇到呢套劇有幾離地架啦！啲宣傳片講述黃宗澤、張繼聰同蕭正楠著到身光頸靚咁輪流教大家點做一個成功嘅PR，片中黃宗澤上樓梯嘅時候，佢撞到個侍應搞到隻玻璃杯跌咗落地爛咗，Bosco之後就撒咗一疊錢上天，佢仲話：「一個成功嘅PR，只要滿足到個客，幫佢贏到人哋嘅，啲錢就會自自然然送上門架啦！」

而張繼聰嗰條片一開頭見到佢同一個女人喺部𨋢親熱，之後佢邊行邊講：「搞eventss梗係要有gimmick啦，上到C1、Facebook又洗到版，咁你就叻仔㗎喇！」

另外，蕭正楠嗰條片就係由佢揸住架名貴跑車到場，一落車就將鎖匙從後拋俾代客泊車員，不過拋唔中要人踎低執返條車匙，之後佢話：「做PR靠樣、靠吹水，死梗啦！，最緊要靠呢度（用手指住個腦）。執生？有排你學呀！」

就咁睇宣傳片係唔係覺得做PR好爽呢？但係現實往往比幻想殘酷得多，唔少網民睇完都鬧爆兼狂數無綫誇張老作，有網民仲話如果做過PR就知有幾辛苦同淒涼、好似做妹仔、有返工冇放工、好心做下research、以為劇集係講男妓等等。

網民留言：

劇集星期一就首播，到時大家就會知係唔係真係咁離地架啦！做PR嘅朋友，不妨留下言講下你同離地宣傳片中嘅PR有幾大分別啦！