姜麗文經歷失戀變更正更強！

曾因失戀而患上抑鬱症的姜麗文，對前度鄭俊弘沒有憎恨，不留惡言，有以前的經歷，才有現時「咁正、咁強」的自己！提到現時的圈外男友，她冧笑大讚200分，更認定對方是老公。

歌手姜麗文（Lesley）最近推出以自身抑鬱症經歷為主題的新歌《念》，希望此曲可以鼓勵抑鬱症患者。6年前她因為失戀引發抑鬱症：「失戀唔開心好合理呀，點知過咗差唔多一年我先開始覺得諗嘅嘢好危險，覺得冇晒希望，喺唔喺呢個世界都冇乜分別，後尾同家人、朋友傾偈同埋睇心理醫生，自己改變咗生活習慣，早睡早起，上網睇一啲讚自己嘅片，做人要Proud Of自己先得，跟住慢慢好番。」

見面唔會尷尬

Lesley坦言目前最開心，從未試過身體及情緒如此健康。當日有傳她被鄭俊弘狠飛，問到可會盡量避免想起他？她豁達地說：「No,that's OK，我覺得做人唔應該後悔任何嘢，亦唔應該嬲或唔開心以前發生過嘅嘢，每一樣嘢發生係有原因，每件事發生，可以將呢個機會更加做好自己，冇以前嘅經歷，依家我唔會有識得感恩、珍惜嘅性格，亦唔會有依家咁正、咁強嘅姜麗文！（對鄭俊弘有冇憎恨？）我淨係想世界和平，希望大家開開心心，身體健康，我唔係嗰啲會好嬲、唔開心嘅人，冇一句壞話可以講。（如果見番面呢？）OK呀！佢依家咁開心，我都係，如果尷尬就會更加唔尊重現任男朋友，佢都畀咗我好多年嘅開心快樂，學咗好多嘢。」

大讚男友200分

提到圈外男友Pakho，她即時冧笑，大讚男友錫她及了解抑鬱症：「每日都會同我傾情緒健康嘅嘢，知道對方每日嘅狀態、情緒、身體健康，對一段關係好重要，呢啲嘢令我真正覺得佢係我嘅Life Partner，佢值200分，我都畀自己200分！」她坦言不心急結婚：「我唔會催婚，女人唔應該畀男人任何壓力，佢想結就結，我有問過爸爸（秦沛）想唔想抱孫，佢話No，順其自然就得。（認定男友係未來老公？）每個人拍拖都有呢個Mission。」以前她不想生小朋友，現在卻因男友而改變！