丁子朗相撲真空露啷啷

藝人森美及丁子朗等昨日為旅遊節目宣傳，兩人在節目中穿上相撲手裝束，森美即場公開「瞓車底」驗走光法，雖然如此，但子朗拍攝時仍不慎走光露「啷」。

由森美率領丁子朗、麥美恩及吳若希在日本拍攝的新一輯《森美旅行團》快將播出，昨日四人為節目落力宣傳，在預告片中，森美與子朗玉帛相見浸溫泉，又化身相撲手，子朗自爆拍攝時不慎走「啷」。

森美表示十分喜歡相撲，雖然工作人員指他們可在相撲帶內穿上短褲，但遭他拒絕，因他想跟足男性相撲手穿法，不過就見子朗面有難色。子朗坦言擔心整潔問題，所以當晚用剃刀清除體毛。森美表示由於兩人身形不及正式相撲手巨型，穿上相撲裝很容易走光，兩人幫對方檢查有否走光，森美即場示範「瞓車底」驗走光法：「我哋真係好似瞓車底咁幫對方檢查，我檢查嘅時候，佢真係冇走光，可能佢走得太大步，所以拍攝時露咗『啷啷』出嚟。」子朗表示人生第一次有男人向他大叫「收番埋佢」：「攝影師話『你走咗粒出嚟』！經歷過呢次乜都唔驚！（為節目而犧牲？）我哋係尊重相撲呢個文化。」麥美恩笑言事後很努力把相片放大，尋找子朗「啷啷」。

吳若希驚冇得立足

至於吳若希亦犧牲偶像形象，與麥美恩以騎呢「面堅尼」拍攝，麥美恩說：「我嗰個係鱷魚面堅尼，但着起變咗冇身材嘅蛇，佢就係粵劇面譜加青花瓷，佢着起真係好肉酸，大家都話『死啦！點同佢公司老闆交代！』」吳若希揚言已豁出去，笑指節目出街後可能要退出樂壇：「麻煩開多幾個節目畀我做，我都怕節目播出後，我冇得喺樂壇立足，森美話會作番首《青花瓷》畀我唱。」