魏浚笙Jeffrey千字文親揭當年浮腫樣上鏡之謎 為保靚樣出4招地獄式去水腫

早前有網民喺學校睇到條政府衛生署2017年推出、談及青少年抑鬱症嘅片，見到主持人竟然係男神魏浚笙，但係當年19歲嘅Jeffrey 竟然同而家嘅靚仔樣好大出入。舊片曝光後，網民都紛紛討論，認為幾靚仔都好，髮型同造型出事都係搞唔掂！

魏浚笙都知道成為話題人物，於是喺IG寫咗篇千字長文，一開頭就話「肥胖和水腫永遠都會是我一生要解決和對抗的命題」，解釋點解當年拍政府短片時點解個樣同而家唔同，以及而家Jeffrey 為咗出鏡好睇所做嘅犧牲。

Jeffrey 話家人同自己都係「肥底」，因此自己細個就肥，而且好易水腫。因為幕前工作，Jeffrey 有4招應付，就係「每天做運動，碌面去水腫，完全不吃東西，每天飲4-6杯齋啡」。至於19歲Jeffrey 拍片出鏡個樣同而家唔同，佢解釋「當時的我起了濕疹和出風癩，所以把原本就肥的我變得更腫，完全再上升到另一個層次，但接了工作就是不舒服硬著頭皮都要把它完成。所以整條影片最後用很灰很灰的顏色掩蓋現實中又紅又腫的我」。

雖然舊樣曝光成為話題，但係魏浚笙冇介懷，寫道「敏感的我也是我，從前肥腫難分的我也是我，很瘦輪廓好看的也是我，就好好擁抱著自己有這麼多的不完美，明星也是普通人，最重要就是愛自己」。Jeffrey 仲話希望有電影可以拍增肥和減肥後的主題，「讓我也好好利用自己身型的變化，肥多次再減多次，然後再操過腹肌」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！