電影LOL︳香港國際影視展預告今年港片陣容 古天樂至少5部在手！

今個禮拜係香港國際影視展(Filmart）嘅日子，唔少電影界行家都喺會場擺檔做宣傳傾賣片。每年Filmart都係各大公司晒冷展示新片陣容，一覽無遺咁睇晒嚟緊港片有咩睇。

爾冬陞講過「而家開戲唔係要有故仔，而係要有『古仔』」。古生古天樂旗下嘅天下一今年繼續有多套出品，大製作嘅應該係古生親自主演嘅大片《守闕者》，係佢同彭于晏繼《危城》後相隔八年再度合作嘅警匪片。天下一仲有多套小品，包括《狂舞派》導演黃修平編導、由《填詞L》女主角鍾雪瑩、游學修及吳祉昊主演嘅《看我今天怎麼說》 ，刻劃失聽者嘅生活。從預告可見三位主角有唔少手語戲份，相信佢地都下咗唔少苦功。

另一套作品係林敏驄、柯煒林和陳穎欣主演的《觸電》，講述車仔（林敏驄飾演）、邦少（柯煒林飾演）、霏霏（陳穎欣飾演）等組成電競隊參加比賽，將親情友情的羈絆化作電競賽場的搏殺，用一場不可能完成的戰鬥，讓心懷夢想的他們不再抱憾。

而最快有得睇嘅應該係吳君如同MC張天賦主演嘅《我談的那場戀愛》。MC演嘅網上騙子偽裝成中年喪妻的法籍石油工程師，透過交友軟件向城中知名婦科醫生余笑琴（吳君如飾）出手嘅故事，喺香港國際電影節首映嘅飛已經賣晒，但相信好快上正場。起初以為《我》係套純喜劇，但從預告睇似乎唔止咁簡單。

天下一仲有好幾套作品在手，呢期趁FILMART都為呢批新片製作海報見街，似乎映期不遠矣。當中包括曾稱《電影痴漢》嘅《曾經擁有》、林明禎做返大馬女子嘅《把幸福拉近一點》、姜皓文同甚少拍電影嘅高海寧主演嘅《鎖戰》等，仲有《送完途中》、《誰變走了大佛》，計落古生起碼有5套戲做主角。但我相信好多人都想知，天下一嘅《尋秦記》電影幾時上？

古生開戲之餘都落場演戲，寰亞大片《九龍城寨．圍城》就有古天樂、任賢齊、林峯、劉俊謙等陣容，幾位演員受訪時都提到套戲好多打鬥位，而且劇組將成個城寨搭出嚟！

另一片商銀都機構至今介紹咗2套新片。已經開鏡嘅《紅豆》有任達華、龔慈恩、鄧麗欣同Jeffrey魏浚笙三代演員演一家人，華哥演潮州爸爸，對Stephy 同Jeffrey兩姊弟一個嚴格一個愛錫，應該引起唔少「潮人」興趣。另一套銀都出品係談善言主演嘅《獄兒日記》，顧名思義就知係女囚犯獄中育兒嘅故事。阿談提到自己嘅角色性格自私，甚至連肚中BB都利用，但最終都因為生命影響生命而改變，聽落甚有挑戰性。談善言加埋《看我今天怎麼說》演聽障少女嘅鍾雪瑩，會唔會已經預約下年金像獎女主角提名呢？

更多電影文章

電影LOL 今期睇咩戲︳填詞L／鬼太郎誕生 咯咯咯之謎／滯留生

電影LOL︳《哥斯拉-1.0》低成本拎奧斯卡最佳視效 香港未有得睇原因係咁？

關於奧斯卡2024 花絮︳Emma Stone晚裝爆拉鏈因為佢？ John Cena全裸頒獎大曬人魚線

電影LOL 關於奧斯卡｜ViuTV冇播放權 香港觀眾冇得喺電視睇頒獎禮

電影LOL︳三大因素加持 《沙丘瀚戰：第二章》開畫全球狂收逾14億

電影LOL︳台片《周處除三害》內地突圍 4日票房收1.4億人民幣

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！