電影LOL︳《哥斯拉-1.0》低成本拎奧斯卡最佳視效 香港未有得睇原因係咁？

近年亞裔作品同電影人喺奧斯卡屢建奇功，《上流寄生族》拎最佳電影、楊紫瓊做影后之後，今屆奧斯卡亞洲作品聲勢上雖然相對低調，但係宮崎駿以《蒼鷺與少年》拎到最佳動畫片之外，《哥斯拉-1.0》打低Marvel《銀河守護隊3》、《職業特工隊︰死亡清算上集》等大片，拎到奧斯卡最佳視效，係《哥斯拉》系列電影面世70年以來，首次奪得金像獎。

拎獎除咗係業界肯定之外，亦係宣傳最佳途徑。外媒IGN等報導，尋晚奧斯卡之後，唔少人討論《哥斯拉-1.0》，尤其係套戲嘅成本 － 根據另一外媒Vultre估計，《哥》埋單開支只係需要美元1000至1500萬元，其他億億聲嘅大片當堂無地自容。有報導指《哥》視效團隊被壓搾兼做到爆肝，但導演山崎貴否認講法，強調團隊唔係開咗好多晚OT，周末都有假放，歸功於電腦幫到唔少。山崎貴又分析，美國片商將視效工作外判，好多時啲鏡頭要重做結果浪費錢同時間，但《哥斯拉-1.0》就係由自家團隊處理。

而拎到獎嘅視效團隊，更加只係得35個人完成全片所有電腦特技工作！IGN指出，《哥斯拉-1.0》可能係近十年來得到最佳視效嘅電影之中，成本最低嗰套。你諗下，上年得獎嘅係《阿凡達2︰水之道》，成本至少3.5億元。近20年，得到視效獎嘅電影大部份都要1億成本以上，可見視效幾咁燒錢。對上一套低成本製作而得到呢個獎嘅係2015年作品《智能叛侶》(Ex Machina），未睇過唔出奇，因為香港冇上映。

講起上映，《哥斯拉-1.0》去年底喺日本上畫，點解香港以至台灣到而家都未上？有分析話，因為《哥》以二戰後日本為背景，擔心會引發亞洲其他國家民眾情緒，片商可能唔會將套戲喺亞洲上畫。另一個講法係已經有串流平台買入版權，因此戲院無得上。

咁即係又多個理由要飛去日本啦 － 睇哥斯拉呀！

更多電影文章

電影LOL 今期睇咩戲︳填詞L／鬼太郎誕生 咯咯咯之謎／滯留生

關於奧斯卡2024 花絮︳Emma Stone晚裝爆拉鏈因為佢？ John Cena全裸頒獎大曬人魚線

電影LOL 關於奧斯卡｜ViuTV冇播放權 香港觀眾冇得喺電視睇頒獎禮

電影LOL︳三大因素加持 《沙丘瀚戰：第二章》開畫全球狂收逾14億

電影LOL︳台片《周處除三害》內地突圍 4日票房收1.4億人民幣

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！