芷珊約您｜蔡一傑@草蜢感激大傻成奎安雪中送炭 節目出街後更夢中相見

TVB全新紀錄式訪談節目《芷珊約您》逢星期日晚上9時半播映，主持黎芷珊碌盡人情牌誠邀樂壇舉足輕重嘅人物作嘉賓，包括溫拿、張敬軒、楊千嬅、王嘉爾、草蜢、許志安及陳慧琳。日前（5日）播出第三集，芷珊帶大家一齊到高雄巨蛋支持草蜢演唱會之外，仲同三子進行一個深度專訪，期間蔡一傑一度哽咽感謝已故好友成奎安雪中送炭。去到噚日（7日），傑仔更喺IG出PO指喺該集出街後，佢竟然夢見成奎安。

去到節目尾聲，草蜢三子應要求講出一個小秘密，佢哋就話入行頭幾年只係表面風光，其實佢哋係非常窮困，嗰時仲繼續住喺屋邨，不過好多隔籬鄰舍會帶好多同學嚟睇，所以佢哋唯有搬屋，但佢哋嘅錢只係夠買三張床褥。之後，蔡一傑就透露已故好友成奎安曾雪中送炭：「嗰時我哋成日都會出街，同大傻一齊出去玩，玩完之後佢送我返屋企，咁呢佢係都要上嚟屋企坐，我話唔好啦，你返屋企啦，都夜啦！但佢死都唔肯，仲問係唔係唔歡迎佢嚟，迫於無耐佢都上到嚟我屋企，佢一打開門冇諗過我屋企係咁架，佢一打開門係真係空寥寥，就連一張櫈都冇，我話屋企係咁架啦，佢坐咗喺地下，佢話冇櫈坐啫，整杯水嚟飲吓都得啩，我就話對唔住，我連雪櫃都冇、水煲都冇，我冇錢呀，當時我哋係窮到咁。」之後佢再話：「嗰個年代我哋表面係風光，內裏其實好慘，第二日大傻就搵佢啲朋友送咗張梳化嚟畀我，係我屋企第一張嘅梳化。好多謝大傻，好感恩，雖然佢已經唔喺度，但我仍然好掛住呢個人。」

喺噚日（7日），傑仔更喺IG出PO指喺該集出街後，佢竟然夢見成奎安：「你話世事幾奇呢！自2009年成奎安（大傻）離開咗之後，我從來冇夢見過佢 ，當節目播出街後唔知係咪佢感應到，昨晚來我夢中相見、在夢中已知你已離開人世，但我們一見面就相擁喜極而泣，大家都說好掛住對方，我仲笑、你就好啦冇皺紋嘅，我而家多咗啲皺紋啦、真係好掛住你呀大傻 #成奎安 #大傻 #蔡一傑 #夢中見 #兄弟情」。呢個PO一出，唔少網民紛紛留言表示好感動，例如「大傻哥應該同我哋一樣 星期日晚睇芷姍約您」、「大儍哥有睇節目 雪中送炭真朋友」、「太感人了！看到傑少哽咽真是忍不住流淚 多謝大傻哥 友情歲月～銘記於心」、「珍摰的友誼，不分遠近不論時空，大家都會互相關心互相遷掛。」、「太好了！大傻哥回來給你打氣 好感動」、「大傻哥一定在天上看著你，保佑你，也替你高興」、「睇完好感動同埋你哋真係真係好兄弟」及「得人恩果千年記, 很respect 傑仔有情有義」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！