雅虎香港新聞 王宗堯入獄後太太首度發長文︰喊完再重新出發
藝人王宗堯因涉及2019年七一衝擊立法會案被控暴動罪成立，三月中被判囚6年2個月。王宗堯喺案件審訊期間，同太太Julia去年10月喺太子開設小食店，現時Julia主力打理鋪頭生意。而Julia尋日就喺IG發文，表達由2月王宗堯罪成還押至今3個月以來嘅感受。
先生，你好嗎？
對上一次拖住你手係 2 月 1 號⋯被攝入鏡頭為我地記錄了⋯
今日 5月1 號⋯出面好大雨，入面呢？
好似過咗好耐咁，原來只不過係3 個月⋯仲記得3 個月前嘅今日，我第一次由法庭一個人返嚟。第一次返到無你嘅家。
當日連新聞都唔敢睇，接住嘅日子就係帶住無靈魂嘅身軀東奔西跑。每日風雨不改就係為咗短聚，希望你唔孤單。為咗氹你笑，仲特登去買啲同你著緊好似嘅衫著去引你笑 ：）
永遠對我充滿信心嘅你，仲不斷鼓勵我自己一個都有能力keep 住去。
我笑住話「我一定會做得比以前更好。」
同事知，客人都知，早段日子返到黎都係喊，講起你就喊，見到你留低嘅嘢喊⋯
就連最近籌備嘅新節日產品，因為每件分量大，諗起無你喺到，我要自己一個人食⋯結果都係喊⋯
喊完再重新出發。
同自己講，每日瞓醒就重新出發。
應承過先生我會做得好好，但今日真係希望耍廢一下⋯新產品容許我聽日先再同大家講⋯辛苦了最近carry 我嘅各位同事。
聽日我會同過去3個月嘅每日一樣再重新出發⋯
王宗堯被判囚當日，Julia聽完審訊後以至翌日仍然返鋪頭，可見佢對小食店有幾堅持。不過後來小食店喺IG出post表示「最近唔知大家有冇成日喺街度見到呢幾隻字 "見攰就唞" 。最近真係有啲攰啦」，並宣布要休息一天。
王宗堯同Julia開設嘅小食店，以台式刈包及冷泡茶做主打，但原來兩個人從未做過飲食生意。王負責設計而Julia主力營運，佢地都表明希望呢盤生意嘅目標係賺錢，以建立一個商業模式，等同佢地一樣冇咩經驗嘅營運者，都可以喺海外做到小生意。而王宗堯被定罪後，喺求情信提到被捕後人生停頓下來，並稱呼Julia為太太，感激對方同佢分憂。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
