楊千嬅成都個唱3.6萬觀眾大合唱感動到淚崩：從頭選擇都係會做歌手

楊千嬅由去年5月展開世界巡迴演唱會《楊千嬅MY TREE OF LIVE 世界巡迴演唱會》，日前（20日）舉行嘅成都場就以33 首全廣東歌歌單打動一班粉絲，全場歌迷熱情地高舉手上電話作應援，令楊千嬅感動落淚，連歌都唱唔到落去。

楊千嬅當晚以飛女狀態空降舞台唱出《飛女正傳》，其後一連唱出《烈女》、《繼續努力》 、《Wonder Women》、《野孩子》、《少女的祈禱》、《小城大事》、《稀客》、《一個人的童話》等經典歌曲，每首都係全場大合唱。楊千嬅多番表示自己要專心唱歌，唔好撩佢傾偈，指一與粉絲傾偈就好易感動。不過，當佢演唱主歌單最後一首《還有事情可慶祝》期間就忍唔住落淚，坦言收到晒粉絲對佢嘅愛：「我非常感謝每一位觀眾，從上次 MY BEAUTIFUL LIVE 我們從一個體育館開始我們的旅程，到今天我可以來到東安湖這個體育場 。我們有進步嘅原因，因為你們願意去成全我們的廣東歌，你哋對音樂的愛，對楊千嬅的愛，我全都收到啦！」

Encore環節，楊千嬅連唱3首Medley，包括《小星星》、《再見二丁目》及《楊千嬅》；唱《小星星》期間，全場3.6萬觀眾企喺身揮動手上電話，滿場「小星星」感動楊千嬅，其後於演唱《再見二丁目》時表示：「我很喜歡這樣，很簡單，很直接去唱歌。」觀眾全場大合唱，令楊千嬅感動到淚崩：「呢首歌係我人生中第一張唱片，哈哈，我有冇記錯？日子就係咁飄過，快要三十年啦，其實我依然係過得很快樂，回頭一看，所有人生及經歷都非常值得。我可以再從頭選擇嘅話，我都係會做歌手。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！