東張西望｜鄧凱文娃娃音扮可愛做訪問 王祖藍都忍唔住出聲：以為我睇緊兒童節目呀

無綫資訊節目《東張西望》採訪唔少社會時事及民生等議題，不過好多時網民都會放錯重點，將重點轉移喺一班靚女主持身上，例如何沛珈、李旻芳、吳幸美、梁敏巧及陳懿德等多位「東張女神」，而23歲落選港姐鄧凱文（Eris）亦獲安排加入《東張西望》大家庭。鄧凱文獲安排主力採訪娛樂新聞，不過佢嘅表現就認真麻麻，去到噚晚（5日）播出嘅訪問片段，佢除咗娃娃音扮可愛之外，仲亂用成語及問問題九唔搭八，搞到王祖藍都忍唔住寸佢。

喺噚晚嘅《東張西望》中，鄧凱文負責採訪《福祿壽訓練學院》淘汰學員嘅幕後花絮，起初佢訪問李思捷都尚算正路，不過去到採訪王祖藍時，佢就用娃娃音扮可愛：「我係孖辮呀，有冇人曳曳先？」之後，王祖藍就話有學員遲到要罰，鄧凱文就爭住叫人罰佢，而王祖藍就開始忍唔住話：「你唔好再講啦，冇人到啦你咁樣，你罰乜嘢呀？」，鄧凱文扮可愛表示罰抄「我以後唔遲到」100次，之後全場靜咗，王祖藍就寸佢：「wow wow Hands Up！我以為我睇緊兒童節目呀！」

之後，佢再訪問阮兆祥，期間佢問擔唔擔心淘汰學員，佢再問：「會唔會係最後一次同大家『首聚一堂』呢？而祥師兄就好好咁更正佢：「聚首一堂呀」，之後王祖藍都忍唔住入鏡話「讀書啦」，令全場大笑，祥師兄再話：「你睇下嗰邊，『出口』呀，你喺嗰邊走得㗎啦～」，鄧凱文就回答「原來我先係被foul嗰個！哈哈！」

訪問出街後，唔少網民都表示頂鄧凱文唔順，留言話：「佢真係好唔掂，講嘢冇料，成日扮可愛，換人啦！」、「是最近一個非常討厭的一個東張西望主持.」及「博出位！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！