孫慧雪產後激減50磅重回顏值巔峰 獲網民激讚兼撞樣韓韶禧

現年41歲索爆人妻孫慧雪，2016年下嫁富二代羅天彥（Edwin Lo），並先後誕下大仔Riley及細仔Rian，一家四口幸福美滿。身為兩子之母嘅雪雪，近日上載一輯為美容中心廣告拍攝嘅性感照片，大騷fit爆身形，原來佢成功減掉50磅，重回顏值巔峰，更有網民指佢與韓星韓韶禧撞樣。

孫慧雪喺上年誕下第二胎後，體重飆升至78公斤，當時佢腹直肌鬆及肚勁大，由於年紀漸長，令佢覺得好難減，不過佢並冇放棄，經過5個月嘅努力後，佢成功搣甩23公斤（50磅）。近日佢上載一輯為美容中心廣告拍攝嘅性感照片到社交網站，相片中嘅雪雪戴上毛毛帽，著上鑲鑽Bra Top，非常性感誘人。唔少網民都紛紛留言大讚佢，例如「真係好叻叻嘅媽媽」、「好勵志」、「功背後嘅辛酸好少人會理解，最重要保持健康，同家人小朋友一起長大，祝️您同家人幸福健康快樂」、「你好叻呀 女人唔易做」、「支持你！靚媽」、「嘩......殺死人咩」、「過程一定幾辛苦，您好叻呀，佩服。最緊要健康」、「雪雪攻擊力好強」、「靚過未嫁時」、「靚到癲」及「哇！靚索到犯規啦，我無法呼吸」等等。另外，更有網民指佢與韓星韓韶禧撞樣：「勁似韓素希，以後化呢個妝！！」、「韓！素！希！」、「1秒以為係韓韶禧」及「以為韓素希」等等。

除咗上載靚相之外，佢仲分享瘦身之道：「一個最真實的分享，由78kg——>55kg 記得生第一胎， 成功減肥之後， 好多人話， 第一胎實keep到， 睇吓佢生第二胎都減到先講啦！ 結果陀第二胎， 真係唔係食好多， 都撼撼聲增磅！ 生完之後，腹直肌鬆咗，個肚勁大， 年紀又大， 真係好難減！ 咁到底係點減？ 其實點減，答案人人都知， 最大嘅問題係你相唔相信自己減到， 同埋有冇目標，有冇恆心，呢個先係最重要！ 我由坐完個大滿月開始， 用五個月時間減返而家個身型， 雖然唔係好瘦好fit, 但我開心自己堅持到！ 首先，我好乖咁去 @mamame.hk 紥肚，做機！ 而同時又好努力做運動！ 多謝我PT Colman 佢真係不停俾正能量我！ 不停鼓勵我！同鞭策我，咁我都好乖去做運動，包括重力訓練同跑下機！ 跟住我又好努力去做療程，等自己唔好因為瘦得快，而減咗胸部或令胸部鬆弛！ 節食方面，其實我第一餐會食有澱粉質嘅食物，例如牛肉通粉，魚蛋米粉，或者雞扒飯，但係個飯就食少啲，到下午茶，會食香蕉，雞蛋，到咗夜晚，我就食蒸魚加碟菜，或者食啲肉+菜+水果！ 咁都足夠應付我一日嘅工作量同埋湊小朋友嘅體力！ 我將做運動同做療程嘅時間，永遠排喺返工前，或者係哥哥返咗學嘅時間，呢幾個鐘，我當係自己做媽媽嘅me time，其他時間除咗工作，就係返去陪小朋友，咁就唔會內疚自己冇陪到小朋友！而又做到自己要做嘅嘢，過到自己要過嘅生活～ keep住呢個習慣，只係維持咗幾個月，就瘦咗咁多啦，希望我呢個例子，會鼓勵到想瘦嘅大家同想keep嘅媽媽啦！ 其實我有幾個朋友，都成日話想同我一齊去做運動，但約咗好多次，佢哋都冇出席，所以我覺得keep fit真係決心同恆心嘅問題，方法就已經知道，做唔做就睇你有幾大決心啦！加油， 我都唔可以懶！ 跟住落嚟，我希望操到有腹肌同瘦多10磅， 然後換晒啲靚衫 #左圖真係好恐怖 #我影低嚟提醒自己 #唔好掉咗啲瘦嘅時候嘅衫 #肥左唔好買衫著住老公啲衫先 #等到瘦先po返張恐怖相出嚟」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！