九龍城寨之圍城｜劉俊謙從未想過做演員 曾自覺人生無意義 終透過演戲抒發情緒

電影《九龍城寨之圍城》上映後即成熱話，劉俊謙飾演刀手信一，與林峯、胡子彤和張文傑聯手惡鬥伍允龍，無論造型與演技均獲關注。另一邊廂，劉俊謙於台灣亦相當活躍，繼電影《小曉》和Netflix台劇《此時此刻》，電影《我在這裡等你》亦將於本月中上映，逐漸喺台灣建立一班支持者，就連小S（徐熙娣）都成功被圈粉，曾經出PO表示劉俊謙可愛：「怎麼辦？我被劉俊謙圈粉了啦，怎麼可以那麼可愛啦」，又曾於活動中直言如果可以同劉俊謙演戲，會覺得好期待。

劉俊謙有樣有演技，可謂新一代男神，但原來佢細個從未想過做演員；劉俊謙自小熱愛運動，包括游泳、慢跑、健身等等，除咗係小學游泳校隊，更憑游泳考入賽馬會體藝中學。賽馬會體藝中學係唯一可100% 自行分配學位之Band 1資助中學，提供正規文法中學課程外，亦讓學生發展體育、藝術嘅潛能；香港籃球運動員蘇伊俊、香港女子羽球運動員「黑妹」葉姵延、香港女子跳水運動員利彥婷等港隊運動員及MIRROR成員王智德（Alton）都係其校友。

熱愛運動嘅劉俊謙有諗過擔任職業運動員和體育老師，但中二嗰年因做運動做得太犀利，致膝蓋受傷，需要休息一段時間，因而覺得人生再無意義，開始胡思亂想，甚至將自己躲藏起來，直至有同學提議佢加入劇社，當時灰爆嘅劉俊謙透過演戲抒發負面情緒，並因而愛上。JUPAS放榜後，劉俊謙成績唔好但又唔想讀ASSO（副學士）和High Dip（高級文憑），就試下報讀香港演藝學院戲劇學院，最後成功考上，主修表演。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！